4: Grammatica - In-Negattiv

Fl-istorja naqraw hekk:

Meta baqa' jinsisti biex titlaq, qaltlu li jekk ma kienx ser jiżżewweġ lilha, kienet se tibdlu fi żrinġ.
Il-Prinċep Ġiljanu m'aċċettax u baqa' jkeċċiha. 

Meta xi ħaġa ma tkunx vera nużaw in-NEGATTIV.

Biex nagħmlu n-Negattiv irridu npoġġu l-kelma ma quddiem il-verb u nwaħħlu l-ittra x fuq wara tal-verb.

Eżempju:

telaq     ->     ma telaqx                         

sabu      ->     ma sabux

kilt        ->     ma kiltx              

torqod   ->     ma torqodx

Mhux il-verbi kolla jsegwu din ir-regola eżatt.

Verbi fit-tielet persuna femminil ibiddlu l-aħħar vokali f'i.

Eżempju:

talbet     ->     ma talbitx                         

ferħet     ->     ma ferħitx

Verbi b'żewġ vokali u li l-ewwel vokali tkun ie, din tinbidel f'i.

Eżempju:

kielu       ->     ma kilux                            

riedet     ->     ma riditx

nieħu      ->     ma niħux                          

bierek     ->     ma birikx

Verbi li jispiċċaw bl-appostrofu, dan jaqa' meta żżidlu l-ittra x fuq wara.

Eżempju:

tefa'       ->     ma tefax                           

baqa'      ->     ma baqax

Verbi li jibdew bl-għ jew b'vokali jieħdu m' flok il-kelma ma.

Eżempju:

għajtu      ->     m'għajtux                         

offrew      ->     m'offrewx